Mərkəzi Nəbatat Bağındakı qanunsuz tikililər sökülür. Bu haqda 6 may tarixində APA məlumat verib.
Bakı şəhərinin mərkəzində yerləşən Mərkəzi Nəbatat Bağında vaxtilə qanunsuz tikilən obyektlərin sökülməsinə başlanılıb. Parkda yerləşən ictimai iaşə obyektlərindən havaya qalxan tüstü və his ərazidəki ağaclara ziyan verir.
“Mərkəzi Nəbatat Bağının ərazisi üçün hazırlanan unikal layihə çərçivəsində əsaslı yenidənqurma işlərinin aparılmasına başlanılacaq. Bununla əlaqədar olaraq hazırda burada təmizlik işləri aparılır, ərazi qaydaya salınır, qanunsuz tikililər sökülür və qısa zaman ərzində yeni layihəyə uyğun burada sakinlərin asudə vaxtının təşkili üçün şərait yaradılacaq”, - Bakı Şəhər İcra Hakimiyyətindən açıqlama verilib.
Daha öncə, 5 may tarixində Prezident İlham Əliyev Mərkəzi Nəbatat Bağında abadlıq, yenidənqurma və tikinti işlərinin həyata keçirilməsi üçün 25 milyon manat ayrılması ilə bağlı sərəncam imzalayıb.
