Bakının Sabunçu rayonunun Maştağa qəsəbəsindəki evinin zirzəmisində çətənə kolları yetişdirən şəxs tutulub. Bu haqda bu gün, 21 avqust tarixində Bakuplus.az Daxili İşlər Nazirliyinin (DİN) Mətbuat Xidmətinə istinadən məlumat verir.
Əməliyyat Sabunçu Rayon Polis İdarəsinin 14-cü Polis Şöbəsinin əməkdaşları tərəfindən həyata keçirilib. Yoxlama zamanı Maştağada - yaşadığı evin zirzəmisində narkotik tərkibli çətənə bitkilərinin kultivasiyası ilə məşğul olan qəsəbə sakini Zaur Quliyev saxlanılıb. Evdən 11 kiloqram olan 96 ədəd çətənə kolu aşkar olunub.
Araşdırma zamanı məlum olub ki, şübhəli bilinən şəxs çətənə bitkilərini yetişdirmək üçün zirzəmidə xüsusi havalandırma, işıqlandırma sistemi yaradıb və oranı ultrabənövşəyi şüalarla təmin edib. O, həmin zirzəmiyə girişi evin çöl hissəsindən yox, mənzildəki otaqların birindən açıb.
Faktla bağlı toplanan materiallar Sabunçu Rayon Polis İdarəsinə göndərilib.
