Sabunçu rayonunun Maştağa qəsəbəsində sakinlər susuzluqdan şikayət edirlər. Bu haqda bu gün, 25 iyun tarixində Bakuplus.az ATV-yə istinadən xəbər verir.
Söhbət “Daş karxanası” kimi tanınan ərazidən gedir. Belə ki, yay fəsli gələn kimi ərazinin yuxarı hissələrinə su qalxmır. Bu da sakinlər üçün çətinliklər yaradır.
“Zəng vurub şikayət edirəm. Deyir: “Ürəyin kimə istəyir, de”. Günlərlə çimə bilmirik. Bizim sayğacımız var, su niyə yoxdur axı?!” – deyə sakinlər bildirirlər.
Bildirilir ki, 1500-2000-ə yaxın ailə bu problemdən əziyyət çəkir.
Azərbaycan Dövlət Su Ehtiyatları Agentliyindən məsələ ilə bağlı bildirilib ki, həmin ərazidəki mövcud xətləri vaxtilə vətəndaşların özləri fərdi qaydada çəkdiriblər. Xətt çəkilən zaman evlərin sayı az olub. Sonradan məskunlaşma artdığından şəbəkə nəzərdə tutulandan artıq yüklənib. Bu səbəbdən də yay aylarında su xətti tələbatı qarşılaya bilmir.
“Gələcəkdə həmin ərazidə mərkəzləşmiş şəbəkənin qurulması nəzərdə tutulub”, – deyə qurumdan bildirilib.
