Bakıda evlərdən 113 min manatlıq oğurluq edilib. Bu haqda 11 iyun tarixində Report məlumat verib.
Nərimanov rayonunda yerləşən mənzillərin birindən 60.000 manat dəyərində qızıl-zinət əşyalarının və qiyməti 3000 manat dəyəri olan xəz dəri oğurlanıb.
Eyni məzmunlu şikayətlərlə Nərimanov rayonunda yaşayan daha 3 sakinin ərizəsi polis idarəsində qeydiyyata alınıb. Onlar da evlərindən ümumilikdə 50.000 manata yaxın qızıl-zinət əşyalarının və pul vəsaitlərinin oğurlandığını bildiriblər.
Polis əməkdaşlarının həyata keçirdikləri təxirəsalınmaz əməliyyat-axtarış tədbiri nəticəsində hadisələri törətməkdə şübhəli bilinən əvvəllər də oğurluq cinayətləri etdiyi üçün dəfələrlə məhkum olunmuş Niyaməddin Əliyev saxlanılıb. Onun evində aparılan baxış zamanı oğurladığı qızılların və digər əşyaların bir qismi gizlin saxlanc yerindən aşkar olunub. O, izahatında törətdiyi əməlləri etiraf edib.
Faktlarla bağlı cinayət işi başlanıb. Niyaməddin Əliyev barəsində məhkəmənin qərarı ilə həbs qətimkan tədbiri seçilib.
