Bakıda çoxmərtəbəli binanın lifti qırılıb. Bu haqda 18 iyun tarixində Qafqazinfo məlumat verib.
Nizami rayonu, Özbəkistan küçəsi 1 ünvanında 17 iyun saat 22:20 radələrində “Yeni Ev 7” MTK-nın tikdiyi çoxmərtəbəli binada qəza baş verib. Belə ki, lift zərbə ilə şaxtaya çırpılıb və nəticədə içində olan 4 qadın və 2 azyaşlı ağır xəsarətlər alıblar. Yaralılar çoxsaylı sınıqlar ilə xəstəxanaya yerləşdiriliblər.
Faktla bağlı araşdırma aparılır.
11:30 - Yenilənib
Liftin qırılması nəticəsində yaralananların vəziyyəti açıqlanıb.
Bakutv-yə istinadən, xəsarət alanlardan dördü bel, bud-çanaq və aşağı ətrafların travması diaqnozu ilə 3 saylı Kliniki Şəhər Xəstəxanasına hospitalizasiya olunub. Bir nəfər isə tibb müəssisəsinə getməkdən imtina edib.
11:55 - Yenilənib
17 mərtəbəli binada liftin qırılaraq şaxtaya düşməsi nəticəsində xəsarət alanların kimliyi məlum olub:
54 yaşlı Afidə Heydərova - sol baldır sümüyünün sınığı, bel nahiyəsinin əziyi;
62 yaşlı Tənzilə Süleymanova - sol ayağının sınığı;
13 yaşlı Leyla Səfərova - sol bud sümüyünün sınığı;
42 yaşlı Yeganə Hacıyeva - topuq sümüyünün sınığı;
15 yaşlı Cəlil Hacıyev - sol qol nahiyəsinin əziyi;
62 yaşlı Sevinc Rəsulova - bel-omba nahiyəsinin əziyi.
