Qaradağ rayonunda 2 nəfərin ölümünə səbəb olan sürücüyə hökm oxunub. Bu haqda 9 avqust tarixində Report məlumat verib.
Bakıda ağır yol qəzası törədərək 2 nəfərin ölümündə təqsirləndirilən Səbuhi Şəfiyevə Bakı Ağır Cinayətlər Məhkəməsində hökm oxunub və o, 7 il müddətinə azadlıqdan məhrum edilib.
Belə ki, hadisə bu ilin mart ayında Bakı dairəvi yolunun 13-cü kilometrində baş verib. “Azpetrol” MMC-yə məxsus olan “MAN” markalı yük avtomobilini idarə edən Səbuhi Şəfiyev yol ayırıcı dəmir arakəsmələrə çırpılaraq əks yola çıxıb. Bu zaman maşın əks tərəfdə hərəkət edən “Mercedes” markalı minik avtomobilinə çırpılaraq aşıb.
Nəticədə minik avtomobilində olan iki nəfər - 35 yaşlı sürücü Musa Almazov və 26 yaşlı sərnişin Mehdi Əsgərli aldıqları xəsarətlərdən yerində dünyasını dəyişiblər. Yük avtomobilinin sürücüsü hadisə zamanı sərxoş olub və qəza nəticəsində xəsarət alıb.
Şəfiyev saxlanılıb və ona qarşı CM-in “Yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma” maddəsi ilə ittiham irəli sürülüb.
