Bakının Səbail rayonu, Qurban Abbasov küçəsində ağaclar kökündən çıxarılıb. Bu haqda bu gün, 23 iyul tarixində Oxu.az məlumat verib.
Videonu paylaşan sosial şəbəkə istifadəçisinin sözlərinə görə, ağaclar yolun genişləndirilməsi işlərinin aparılması üçün məhv edilir.
Faktla bağlı Ekologiya və Təbii Sərvətlər Nazirliyi (ETSN) araşdırma aparıb. İlkin məlumata görə, Bakının Səbail rayonu ərazisində yolun kənarında ağacların məhv edilməsi faktı təsdiqlənib.
ETSN-in mətbuat xidmətinin rəhbəri İradə İbrahimova bildirib ki, qurumun əməkdaşları tərəfindən aparılan araşdırma zamanı 3 ağacın kökündən çıxarıldığı məlum olub.
"Hadisədə əli olan təşkilatın müəyyənləşdirilməsi istiqamətində araşdırma aparılır. Hadisəni törədən şəxslər barəsində lazımi tədbirlər görüləcək", - deyə İbrahimova bildirib.
Səbail Rayon İcra Hakimiyyətinin nümayəndəsi isə, öz növbəsində, qeyd edib ki, həmin ağacların kəsilməsi ETSN-in rəyi əsasında həyata keçirilib. Bildirilib ki, ərazidə iki irigövdəli ağac güclü külək səbəbindən bir neçə gün öncə aşıb, daha üç ağac isə quruduğu üçün kəsilib.
