Bakıda təqaüdçülərin pulunu oğurlayan şəxslər tutulub. Bu haqda 18 aprel tarixində Daxili İşlər Nazirliyi məlumat verib.
Nizami rayonunda naməlum şəxs bankomatlardan birinin qarşısında təqaüdçünün etibarından sui-istifadə edərək onun kartında olan 250 manatı ələ keçirib. Zərərçəkən bankomatın qarşısında olan zaman kartından pul çıxarmaqda ona köməklik etməsi üçün yaxınlıqda olan 1 nəfərə müraciət edib. Həmin şəxs kartı bankomata daxil edəndən sonra hesabda pulun olmaması barədə zərərçəkənə yalan məlumat verib. Kart sahibi ərazidən uzaqlaşandan sonra bankomatdan çıxan pulu isə həmin şəxs götürərək hadisə yerindən uzaqlaşıb.
Eyni məzmunlu şikayətlə Nizami rayon sakini polisə müraciət edib. Bir nəfərin onun kartından 1000 manatı qeyd edilən üsulla oğurladığını bildirib.
Polis əməkdaşlarının həyata keçirdikləri əməliyyat-axtarış tədbiri nəticəsində hadisəni törətməkdə şübhəli bilinən Namiq Mehdiyev və Nemət Cabbarov saxlanılıblar. Onlar etdikləri cinayətləri etiraf ediblər.
Araşdırma zamanı məlum olub ki, onlar Ağcəbədi rayonunda daha bir neçə şəxsin kartından müxtəlif məbləğlərdə pul oğurlayıblar. Faktlarla bağlı Cinayət Məcəlləsinin müvafiq maddəsi ilə ciayət işi başlanılıb və onlar barəsində məhkəmənin qərarı ilə həbs qətimkan tədbiri seçilib.
