Xətai rayonu, Türkan qəsəbəsində məktəb şagirdini it dişləyib. Bu haqda bu gün, 29 mart tarixində Bakuplus.az Bizim.Media-ya istinadən xəbər verir.
Hadisə Elmar Mirzəyev adına sağlamlıq imkanları məhdud uşaqlar üçün 6 nömrəli respublika xüsusi internat məktəbinin həyətində baş verib. 5-ci sinifdə oxuyan Zakir Vəliyevə məktəbin həyətində sahibsiz it hücum edərək, ayaq və bud nahiyəsindən dişləyib.
“Yeni Baxış” İctimai Nəzarət təşkilatının mətbuat katibi Vüqar Əmirov deyib ki, xəsarət alan şagirdə yerində nə köməklik olunub, nə də ona təcili yardım çağırılıb. Şagirdin valideyni hadisədən xəbər tutan kimi məktəbə gəlib və uşağı özü xəstəxanaya çatdırıb.
Bildirilir ki, 8 saylı Təcili Tibbi Yardım Stansiyasının Türkan filialında uşağı və ailəsini qəbul etməyiblər. Onlar vaksinin olmadığını və başqa xəstəxanaya getməli olduqlarını deyiblər.
“Növbədə olan həkim yuxulu vəziyyətdə qapını açıb, quduzluğa qarşı vaksinləri olmadığını deyərək yaralı uşağa heç bir müdaxilə etməyib”, – deyə qeyd olunub.
Məktəbin direktoru uşaqların daimi nəzarətdə olduğunu və anlıq gözdən yayınma səbəbindən itin hücumuna məruz qaldığını vurğulayıb. Bundan əlavə, uşaq onu it dişlədiyini demədiyindən dərhal müdaxilə olmayıb.
TƏBİB-dən isə Təcili Tibbi Yardım Stansiyasının qapısının bağlı olması məsələsinin araşdırılacağı deyilib.
