Sabunçu rayon Dövlət Yol Polisi Şöbəsinin və Baş Dövlət Yol Polisi İdarəsinin Əlahiddə Dəstəsi əməkdaşlarının keçirdikləri reyd zamanı rayon ərazisində avtomobili narkotik vasitənin təsiri altında idarə edən sürücü saxlanılıb. Araşdırma zamanı avtomobili idarə edənin müğənni Ruzigar olduğu məlum olub. Bu haqda bu gün, 8 aprel tarixində Bakuplus.az Oxu.az-a istinadən məlumat verir.
Müğənni tibbi müayinəyə dəvət olunub. Müayinə zamanı Ruzigarın narkotik vasitənin təsiri altında olduğu müəyyən edilib.
Sürücü bu maddələri 6 ay əvvəl xarici ölkədə olarkən qəbul etdiyini bildirib: “Çox güman ki, qanda qalıb”.
Baş DYP İdarəsinin Xüsusi tağımının inspektoru, polis baş leytenantı Elmir Əmirovun sözlərinə görə, Ruzigar qoşa xətti pozub. Saxlanma zamanı o, qeyri-adekvat hərəkətləri şübhə doğurduğu üçün tibbi müayinəyə dəvət edilib.
“Müayinə zamanı həkimin rəyi nəticəsində məlum oldu ki, sürücü narkotik vasitələrin təsiri altındadır və bu vəziyyətdə maşın sürür”, - inspektor bildirib.
