Oktyabrın 4-də Maştağa qəsəbəsində itkin düşmüş 32 yaşlı qadın və dörd övladının olduqları yer müəyyən olunub. Bu haqda bu gün, 12 oktyabr tarixində Bakuplus.az Qafqazinfo-ya istinadən məlumat verir.
Daxili İşlər Nazirliyinin (DİN) mətbuat xidmətinin əməkdaşı Nurlan Əliyev bildirib ki, Sabunçu rayonunun Maştağa qəsəbəsi sakini olan 32 yaşlı qadının oktyabrın 4-ü günorta saatlarında övladları ilə birgə itkin düşməsi ilə bağlı polis orqanına müraciət daxil olub: “Bununla bağlı araşdırma aparılıb. Kriminal tərkib yoxdur. Onların harada olduqları məlumdur”.
Daha öncə məlum olub ki, Ağazaman Salamzadə polisə müraciət edərək bildirib ki, onunla eyni ünvanda yaşayan arvadı Qızxanım Salamzadə övladları – 19 yaşlı Əbil Salamzadə, 17 yaşlı Aysun Salamzadə, 15 yaşlı Aynişan Salamzadə və 13 yaşlı Səadət Salamzadə ilə birlikdə yaşadıqları ünvandan çıxıb və geri qayıtmayıb.
