Xəzər rayonunda 55 yaşlı kişi bacısını və bacısı oğlunu bıçaqlayıb. Bu haqda 6 iyul tarixində Bizim.media məlumat verib.
Buzovna qəsəbəsində Elvin Səlimov bacısına və onun oğluna bıçaq xəsarətləri yetirib. Belə ki, mətbəx bıçağını itiləmək məqsədilə ayaqqabı təmiri yerinə gedən Səlimov, obyekt bağlı olduğundan, yolüstü bacısı Gülnazgilə (şərti ad) gedib. Yolda marketdən 250 qramlıq spirtli içki alıb və içib. Küçədə Gülnazı görüb və onlara gedib.
Bloka daxil olduqda bacısı Elvinin kürəyində bıçaq görüb və qışqıraraq üstündə nə üçün bıçaq olduğunu soruşub:
“Bacıma dedim ki, nə üçün qışqırırsan, öldürəcəm səni. Bacım daha da qışqırmağa başladı. Həmin vaxt sərxoş olduğum üçün bacımın səsi mənə pis təsir etdi. Bacımın sakitləşməsi üçün bıçağı çıxardım. O, bunu gördükdə məni itələdi və aramızda yaranmış mübahisə zamanı bıçaq ilə onu vurdum. Bacımı vurmağıma baxmayaraq, yenə də sakitləşmədi, əksinə, daha da yüksəkdən qışqırmağa başladı. Onu bıçaqla bir neçə dəfə də vurdum”.
Səs-küyə bacısının oğlu evdən çıxıb. Anasını müdafiə etmək üçün o, Elvinin üstünə tullanıb və aralarında mübahisə yaranıb. Bu zaman Səlimov onu da bıçaqla vurub və sonra oradan gedib. 2 gündən sonra o, polisə təslim olub.
Onun barəsində CM-in “Ümumi təhlükəli üsulla və ya xuliqanlıq niyyəti ilə qəsdən sağlamlığa az ağır zərər vurma” və “Silah qismində istifadə etməklə xuliqanlıq törətmək” maddələri ilə ittiham elan edilib.
Məhkəmə, bacısı və bacısı oğlunun Səlimovla barışdığını və şikayətlərinin olmamasını nəzərə alaraq, Elvinin 2 il 1 ay 29 gün müddətinə azadlıqdan məhrum edilməsinə qərar verib.
