Bakıda ər boşanmaq istəməyən arvadını şil-küt edib. Bu haqda 4 iyul tarixində Bizim.media məlumat verib.
Xəzər rayonunda bu il fevralın 8-də sabiq polis əməkdaşı, 44 yaşlı Valid Babayev şəxsi münasibətlər zəminində arvadı Xumara (şərti ad) xəsarətlər yetirib. Qadın Xəzər rayon Polis İdarəsinin 3-cü polis şöbəsinə müraciət edərək ərindən şikayət ərizəsi yazıb.
Zərərçəkmiş Xumarın sözlərinə görə, əri bir neçə il polis işləyib:
“Ərim əvvəl polis işləyib, lakin təqaüdə çıxdıqdan sonra mənə və azyaşlı övladlarına qarşı pis rəftar etməyə başlayıb. Evdə olan əşyaları satdı, pulunu bilmədiyim yerlərə xərclədi. Buna etirazımı bildirəndə isə təqsirləndirilən şəxs məni döyüb. Lakin bu barədə heç vaxt polisə müraciət etməmişəm. Hadisə günü şəxsiyyət vəsiqəmi istədi. Bildirdi ki, mənimlə boşanmaq istəyir. Lakin vəsiqəmi vermədim. Buna görə də məni döydü, xəsarətlər yetirdi. Bu səbəbdən şikayətçi oldum”.
Lakin Babayev öz ifadəsində arvadını başqa səbəbə görə döydüyünü deyib:
“Maddi vəziyyətim pis olduğu üçün bankdan kredit götürmək məqsədilə hadisə baş verən gün arvadımdan şəxsiyyət vəsiqəsini istədim. Lakin Xumar vəsiqəsini vermədi. Bundan əsəbiləşdim. Onun qol nahiyəsinə və baş nahiyəsinə yumruqla bir neçə dəfə vurdum”.
Babayevin barəsində Cinayət Məcəlləsinin “Qəsdən sağlamlığa xəsarət yetirmə” maddəsi ilə ittiham elan edilib. Məhkəmənin hökmü ilə Valid qazancının 20 faizi dövlət nəfinə tutulmaqla, 9 ay müddətinə islah işləri cəzasına məhkum edilib.
