Bakıda müştərinin dizinə əl-qol atan və icazəsiz şəklini çəkən taksi sürücüsü həbs olunub. Bu haqda bu gün, 12 aprel tarixində Bakuplus.az Qaynarinfo-ya istinadən məlumat verir.
Qadın “Koroğlu” metro stansiyasının yaxınlığında taksi avtomobilinə minib. Sürücü yola düşdükdən sonra tuneldə müştəriyə qarşı əxlaqsız hərəkətlər etməyə başlayıb. Bununla bağlı qadın polisə müraciət edib.
Polis bölməsinə dəvət olunan sürücü özünü təqsirli bilməyib. Onun sözlərinə görə, sərnişin işə gecikdiyini bildirdiyi üçün o, əlavə sərnişin götürməyib. Sürücünün nömrəsini götürən xanım isə 5 gündən sonra onunla əlaqə saxlayaraq söhbət etmək istəyib.
“Bu zaman məni narahat etməməsini tapşırdım. Himayəmdə azyaşlı uşaqlar və onkoloji xəstə olan atam var”, - deyə sürücü öz izahatında bildirib.
Sərnişin isə qeyd edib ki, gecikdiyi üçün yolda gördüyü taksiyə oturub və astma xəstəsi olduğuna görə avtomobildə öndə əyləşib. Avtomobildə ondan başqa heç kəs olmayıb. Bu zaman o, sürücüdən niyə əlavə müştəri götürmədiyini soruşduqda sürücü ona görə götürmədiyini bildirib. Daha sonra sürücü ondan mobil nömrəsini istəyib və qadın qorxusundan dostunun nömrəsini verib. Bu zaman sürücü həmin nömrəni yığıb və ona aid olmadığını anlayıb. Onun dizinə əl-qol atıb və tuneldə icazəsiz şəklini çəkib.
Məhkəmənin qərarı ilə sürücü təqsirli bilinib və barəsində 10 gün müddətinə inzibati həbs cəzası tətbiq edilib.
