8 Mart - Beynəlxalq Qadınlar Günündə Heydər Əliyev Mərkəzi “Opera və moda. Sultan Couture 20” adlı konsert proqramı və sərgi təqdim edəcək. Bu haqda mərkəzin mətbuat xidməti bu gün, 31 yanvar tarixində məlumat verib.
Konsertdə məşhur opera müğənniləri - beynəlxalq müsabiqələr laureatı Yana Melikayeva (messo-soprano), Stanislavski və Nemiroviç-Dançenko adına Moskva Akademik Musiqili Teatrının solisti Anastasiya Çernovolos (soprano), Sankt-Peterburq Dövlət Akademik Teatrının solisti Mariya Yuliya Süleymanova (soprano), Yekaterina Sannikova (soprano) və Moskva Musiqili “Helikon-Opera” Teatrının solisti Elnarə Məmmədova (soprano) iştirak edəcəklər.
Heydər Əliyev Mərkəzinin səhnəsində sənətçilər Azərbaycan və xarici bəstəkarların ən məşhur əsərlərini ifa edəcəklər. Sənətçiləri dirijor Mustafa Mehmandarovun rəhbərliyi ilə Üzeyir Hacıbəyli adına Azərbaycan Dövlət Simfonik Orkestri müşayiət edəcək.
Gecəni xüsusi edəcək digər məqam isə modelyer Orxan Sultanın Bakı konserti üçün xüsusi olaraq tikdiyi libaslarda opera müğənnilərinin səhnəyə çıxmaları olacaq.
Belə ki, konsert zamanı 20 illik yubileyini qeyd edən “SULTAN COUTURE&Co” brendinə məxsus 16 geyimdən ibarət olan kolleksiya təqdim olunacaq.
Gecədə səhnəyə çıxacaq müğənnilər “BVLGARI” brendindən olan zinət əşyalarını da təqdim edəcəklər.
Biletləri Mərkəzin kassalarından, iTicket.az saytından və satış məntəqələrindən əldə etmək olar.
