YARAT Mərkəzində türk rejissor ilə görüş olacaq. Bu haqda bu gün, 16 dekabr tarixində Bakuplus.az mərkəzə istinadən xəbər verir.
Kinorejissor, ssenarist və kinoprodüser Semih Kaplanoğlu türk kinosunun ən istedadlı və nüfuzlu rejissorlarındandır və dünya üzrə 30-dan çox beynəlxalq mükafata layiq görülüb. O, 2013-cü ildə Kann Film Festivalında "Cinefondation" və "Qısa filmlər" bölmələri üzrə münsiflər heyətinin üzvü olub.
Semih Kaplanoğlunun "Hər kəs öz evində" debüt tammetrajlı filmi 2001-ci ildə Sinqapur Beynəlxalq Film Festivalında "Ən yaxşı rejissor" mükafatına layiq görülüb. Kino ilə yanaşı, rejissor plastik incəsənət və kino haqqında məqalələr də yazıb.
Görüş 19 dekabr saat 12:00-14:00 arası YARAT Mərkəzində baş tutacaq. Tədbir türk dilində keçiriləcək. İştirak üçün linkə daxil olub qeydiyyatdan keçmək lazımdır.
