Bakının Pirallahı rayonunda parkda baş verən sevgi mübahisəsi zorakılıqla nəticələnib. 1996-cı il təvəllüdlü Fəqan tanışı Nüşabəni (adlar şərtidir – red.) döyməkdə ittiham olunub.
Demokrat.az xəbər verir ki, hadisə axşam saatlarında qeydə alınıb. Şəxsi münasibətlərin pozulması zəminində yaranan mübahisə zamanı Fəqan sevgilisi Nüşabəyə bədəninin müxtəlif nahiyələrindən zərbələr endirib. Ona qarşı Cinayət Məcəlləsinin 128-ci maddəsi ilə ittiham irəli sürülüb.
Məhkəmədə ifadə verən Fəqan bildirib ki, Nüşabə zənglərinə cavab vermədiyi üçün onunla tez-tez gəzdiyi parka gedib və əsəbi halda çiyni ilə vurub, zənglərə niyə cavab vermədiyini soruşub. Onun sözlərinə görə, qadın bu zaman "məni biabır edirsən" deyərək qışqırıb və Fəqan da oradan qaçaraq uzaqlaşıb. Zərərçəkmiş qadın isə əksinə, Fəqanın onu uzun müddət narahat etdiyini, hədələdiyini və parkda azyaşlı qızının yanında döydüyünü deyib. Qadın kömək üçün qışqırdıqdan sonra Fəqan hadisə yerindən qaçıb.
Nüşabənin sözlərinə görə, Fəqanla 1 il əvvəl Pirallahı qəsəbəsində yerləşən marketdə işlədiyi vaxtlarda tanış olub. Ancaq daha sonra Fəqan münasibətlərini gizli saxlaya bilməyib, tez-tez qadının yaşadığı ünvana gəlib və zənglər edib. Nəticədə Nüşabə onunla münasibətini kəsib.
İşə Pirallahı Rayon Məhkəməsində baxılıb. Proses zamanı tərəflər barışıb. Zərərçəkmiş qadın sevgilisini bağışladığını və şikayətini geri götürdüyünü bildirib.
Məhkəmənin qərarı ilə cinayət təqibinə xitam verilib, Fəqan cinayət məsuliyyətindən azad edilib.
