Bakının Qaradağ rayonunda 18 yaşlı oğlan anasına bıçaqla xəsarət yetirib.
Demokrat.az xəbər verir ki, hadisə ötən ilin yanvarın 3-də Sahil qəsəbəsində yerləşən yataqxanada baş verib.
İttihama görə, 2008-ci il təvəllüdlü Sərxan yaşadığı mənzildə anası Südabə (adlar şərtidir) ilə mübahisə edib. Mübahisəyə səbəb anasının ona bayram üçün söz verdiyi 100 manatı verməməsi olub. Sərxan bildirib ki, pulu istədikdə anası imtina edib, daha sonra istifadə etdiyi mobil telefonu yerə çırpıb. Buna əsəbiləşən gənc mətbəxdən götürdüyü bıçaqla anasının kürək nahiyəsinə bir dəfə zərbə vurub.
Zərərçəkmiş qadın da ifadəsində oğluna 100 manat verəcəyinə söz verdiyini, lakin həmin pulu vaxtında verə bilmədiyini deyib.
Qadın xəstəxanaya yerləşdirilib. Sərxan isə sonradan polis əməkdaşları tərəfindən saxlanılıb.
Onun barəsində Cinayət Məcəlləsinin 126.1-ci maddəsi ilə ittiham irəli sürülüb. Bakı Ağır Cinayətlər Məhkəməsinin hökmü ilə Sərxana 3 il şərti cəza verilib və 1 il sınaq müddəti təyin olunub. Zərərçəkmiş məhkəmədə oğlunu bağışladığını və ondan şikayətçi olmadığını bildirib.
