Yasamal rayon prokurorluğunda 2010-cu il noyabrın 18-də kəllə-beyin travması ilə xəstəxanaya daxil olan Qürbət Abzərovun ölümü ilə bağlı cinayət işi açılıb. Cinayətkarı tapmaq mümkün olmadığı üçün iş üzrə icraata xitam verilib. Bu barədə bu gün, 10 iyun tarixində Baş Prokurorluq və Daxili İşlər Nazirliyinin birgə məlumatında deyilir.
Baş Prokurorluq, Daxili İşlər Nazirliyi və Dövlət Təhlükəsizliyi Xidmətinin əməkdaşları tərəfindən cinayətin üstü açılıb. Daha sonra iş əlavə araşdırmaların aparılması üçün Baş Prokurorluğun İstintaq İdarəsinə verilib.
Araşdırma zamanı müəyyən edilib ki, 1964-cü il təvəllüdlü Telman Məcidov 1969-cu il təvəllüdlü Qürbət Abzərovla birgə cəzaçəkmə müəssisəsində saxlanılıb. 2010-cu il noyabrın 18-də cəza müddəti başa çatdıqdan sonra həmin şəxslər görüşüblər.
Abzərov Telman Məcidovun ailə üzvlərinin ünvanına təhqiramiz ifadələr işlətdiyinə görə, Məcidov ondan qisas almaq istəyib. Aralarında yaranmış mübahisə zamanı o, Abzərovun başına dəmir çubuqla vurub. Aldığı xəsarət nəticəsində Abzərov 8 gün sonra xəstəxanada ölüb.
Telman Məcidovun barəsində “Zərərçəkmiş şəxsin ölümünə səbəb olan qəsdən sağlamlığa zərər vurma” maddəsi ilə cinayət işi başlanılıb, barəsində həbs-qətimkan tədbiri seçilib.
Faktla bağlı istintaq-əməliyyat tədbirləri davam etdirilir.
