Paytaxt məktəbində şəhidin büstünün açılış mərasimi keçirilib. Bu haqda 4 aprel tarixində Təhsil Nazirliyi məlumat verib.
285 nömrəli tam orta məktəbdə şəhid Bünyadəli Pələngovun 65 illik yubileyi münasibətilə büstünün açılışı və xatirəsinə həsr olunmuş “Şəhid köynəkli ömür” adlı kitabın təqdimat mərasimi keçirilib.
Tədbir zamanı Vətən müharibəsində şəhid olanların xatirəsi bir dəqiqəlik sükutla yad edilib. Açılış mərasimində Bakı Şəhəri üzrə Təhsil İdarəsinin müdiri Mehriban Vəliyeva, Suraxanı Rayon İcra Hakimiyyətinin başçısı Əziz Əzizov, şəhidin ailə üzvləri, ictimaiyyət nümayəndələri, müəllimlər, şagirdlər və digər qonaqlar iştirak ediblər. Daha sonra tədbirdə məktəblilərin ifasında vətənpərvərlik mövzusunda şeirlər səsləndirilib, ədəbi-bədii kompozisiyalar nümayiş olunub.
Qarabağın Naxçıvanik kəndi uğrunda gedən döyüşlərdə rəhbərlik edən Bünyadəli 26 iyun 1992-ci ildə Ağdamın Aranzəmin kəndindəki mühasirədə olan əsgərləri xilas edərkən şəhid olub. 1993-cü ildə Suraxanı rayonu 285 nömrəli orta məktəbə “Bünyadəli Qulam oğlu” adı verilmişdir. Məktəbin girəcəyində xatirə lövhəsi vurulmuşdur.
[caption id="attachment_39287" align="alignnone" width="800"] Foto Təhsil Nazirliyinin rəsmi saytı[/caption]
