Bu gün Qurban Qurbanovun 54, oğlu Musa Qurbanlının 24 yaşı tamam olur.
Bakuplus.az xəbər verir ki, Qurban Qurbanov 13 aprel 1972-ci ildə Zaqatala rayonunun Aşağı Tala kəndində fəhlə ailəsində anadan olub. Üç bacısı, iki qardaşı olan Qurban, valideynlərinin sonuncu övladıdır.
Uşaq vaxtlarından futbolla məşğul olub. 9-cu sinifdə oxuyarkən məşqçi Şaban Şirdanov onu "Daşqın" Zaqatala klubuna gətirib. 9-cu sinfi bitirəndə həmin klubda əsas heyətdə oynamağa başlayıb.
1989-cu ildə atası, 2017-ci ildə isə anası vəfat edib. 2000-ci ildə ailə həyatı qurub. Qurbanovun üç övladı var — qardaşının adını daşıyan Musa, Zəhra və anasının adını daşıyan Güləbatın.
Qurban Qurbanov 2008-ci ildən indiyə kimi "Qarabağ"ın baş məşqçisidir. "Qarabağ" klubu ilə bir neçə dəfə Azərbaycan Kubokunun qalibi olub, on dəfə Azərbaycan Çempionatının qızıl, bir dəfə gümüş, iki dəfə isə bürünc medalını qazanıb.
Onu da qeyd edək ki, bu gün həm də Qurban Qurbanovun oğlu, "Qarabağ" futbol klubunun oyunçusu Musa Qurbanovun da doğum günüdür.
