Pierre Baillargeon dizayn və təqdimat sahəsində 25 illik təcrübəyə malikdir. 2006-cı ildə Londonda “Mixity” adlı dizayn şirkətini təsis edib. Hazırda məşhur “Mixity” memarlıq və dizayn şirkətinin icraçı direktorudur.
Kanadanın Monreal şəhərində dünyaya göz açan Pierre Baillargeon, Kornell Universitetinin Memarlıq Sənayesi və Planlaşdırma Kollecində təhsil alıb. Texas ştatının Dallas şəhərində WZMH-da işləməyə başlayıb. ABŞ-da HOK şirkətinin memarları ilə beş il birlikdə çalışdıqdan sonra Böyük Britaniyaya gedib. Londonda HOK şirkətinin Avropa-Yaxın Şərq bölməsini təsis edib. Bir müddət sonra həmin bölmə HOK şirkətinin ən böyük və nüfuzlu ofisinə çevrilib. Londondakı HOK ofisində dizayn sahəsində lider və vitse-prezident olan Pierre Baillargeon otellər, AVM-lər, şəhərsalma, ofis və bir çox HOK kommersiya əsaslı nəhəng layihələrin hazırlanmasına rəhbərlik edib. Pierre Baillargeon dünyada ən böyük Amerika memarlıq şirkəti olan HOK-un beynəlxalq nüfuzunu yüksəltmək üçün ömrünün 20 ilini həsr edib.
Uzun müddət davam edən axtarışımızdan sonra nəhayət məşhur memar, dizayner Pierre Baillargeonun Bakıda inşa etdiyi möhtəşəm binaları da müəyyən etdik. P.Baillargeon Bakı şəhərində nəhəng “Flame Towers” ("Alov Qüllələri"), “Trump Tower” və “Baku Fountain City” (Bakı Fəvvarələr şəhəri) layihələrinin müəllifi, baş memarıdır.
Pierre Baillargeon HafizTimes.com-a eksklüziv müsahibə verib. İlk dəfə Bakıda “Alov Qüllələri” layihəsinin hazırlanması ilə bağlı mühüm məqamları açıqlayıb. O həmçinin Bakıda inşa etdiyi “Trump Tower” layihəsi ilə bağlı bir çox gizli qalmış məqamlardan da söhbət açıb. Müsahibə zamanı məşhur memar P.Baillargeon Azərbaycan, Bakı ilə bağlı fikir və arzularını da ifadə edib:
– Bakı gözəl bir şəhərdir. İlk dəfə oranı ziyarət edən zaman çox təsirləndim. Bakı üçün əhəmiyyətli bir bina inşa etməklə bağlı təklif aldım. Bu zaman tarixi qaynaqlarınızdan ilhamlandım.
“Baku Flame Towers” – Azərbaycanın gələcək güc potensialının və keçmiş tarixinin simvoludur. Bakının əsas təpələrindən birinin üzərindən göyə ucalan alov dilimləri kimi dizayn edilib. Orijinal dizaynda dörd qüllə əks olunub. Layihəyə əsasən, qüllələrin sayı azaldılıb.
– “Flame Towers” layihəsi necə yarandı? Həmin günləri necə xatırlayırsınız? Niyə məhz əsas element kimi alovu seçdiniz?
– Mən “Flame Towers”in dizaynında atəşin qədim ənənələrini, əhəmiyyətini və alovun gələcəkdə Azərbaycana enerji və tərəqqi bəxş edəcəyini əks etdirdim. Həmçinin "Alov Qüllələri"ni Azərbaycanın neft və təbii qaz resurslarını əks etdirən bir formada dizayn etdim.
“Flame Towers”la bağlı ideya və dizaynımı Prezident İlham Əliyevə təqdim etməkdən böyük zövq aldım”
– Prezident İlham Əliyev mənə dedi ki, binanın tikintisi ilə bağlı dərhal işlərə başlaya bilərəm. Sizin vasitənizlə bir daha Prezident İlham Əliyevə öz minnətdarlığımı göndərirəm. "Alov qüllələri" Azərbaycanı dünyada tanıdan, təmsil edən bir simvola çevrildi. Gözəl ölkəniz və insanlarınız üçün Alov Qüllələrini yaratmaq imkanına sahib olduğum üçün qürur duyuram.
“Cənab Tramp Ağ Evdə yeni işinə başladığı andan etibarən hələ də Bakıdakı “Trump Tower” adlı layihəmə yeni ad axtarılır”
– Məndən xahiş etdilər ki, “Trump Tower” adlı bir layihəni yaradım. Bu layihəm də çox əhəmiyyətli bir simvoldur. Həmin otelin sahibləri qapıları açan zaman Azərbaycanda hər kəs yeni və gözəl formada dizayn edilmiş otel və konfrans salonundan zövq alacaq.
“Qapılarını dünyaya açmağa hazır olan böyük və həyəcanlandıran bir şəhər layihəsinin hələ də bağlı qalması çox kədərlidir”
– Ümid edirəm ki, tezliklə Bakıya səfər edəcəyəm və otelin qapılarının təntənəli şəkildə açıldığını görəcəyəm. Bu bina da Bakının beynəlxalq nüfuzuna və cəzbediciliyinə daha da böyük töhfələr verəcək.
“Azərbaycandakı layihələrimlə qürur duyuram”
– “Mixity”dəki memarlar və daxili dizaynerlərdən ibarət qrupumuz Azərbaycandakı fəaliyyətimizlə qürur duyur. Biz ümid edirik ki, gələcəkdə də Bakıya qayıdıb yeni layihələr üzərində çalışacağıq! Azərbaycanı sevirik. Hər zaman bütün dostlarımıza da tövsiyə edirik ki, Azərbaycana səfər etsinlər! Ümid edirəm ki, tezliklə Bakıya səfər edəcəyəm və sizə orada daha geniş müsahibə verəcəyəm.
