Masazırda yaranan su probleminə aydınlıq gətirilib.
İri Şəhərlərin Birləşmiş Su Təchizatı Xidmətinin Mətbuat xidmətindən BakuPlus.az-ın sorğusuna cavab olaraq bildirilib ki, həmin ərazidə su xəttində qəza hadisəsi baş verib:
“Hazırda qəzanın aradan qaldırılması işləri həyata keçirilir. İşlər axşam bitəcək və suyun əvvəlki rejimlə verilməsi bərpa ediləcək”.
***
12:02
Abşeron rayonu Masazır qəsəbəsinin sakinləri su təchizatlarının bərbad vəziyyətdə olmasından şikayətçidirlər.
Bakuplus.az-a müraciət edən Nizami Gəncəvi, Rafiq Dünyamalıyev, Hüseyn Cavid, General Həzi Aslanov küçələrində yaşayan bir qrup sakin bildirib ki, analoji çətinliklərlə illərdir üzləşirlər, amma adətən bu, yay aylarında müşahidə olunub:
“İndi isə “Azərsu” payızda da başımıza oyun açmaq qərarına gəlib. 3 gün suyumuz olmadı, sonra bir neçə saatlıq bizə yazıqları gəldi. İndi yenə 2 sutkadır su üzünə həsrətik. 955 “Qaynar xətti”nə zəng vururuq, şikayətimizi, çarəsizliyimizi bildiririk. Ancaq nə fayda? Ancaq yalan vədlər, yalan sözlər eşidirik. Su yoxdur ki, yoxdur”.
Şikayətçilər saytımıza hansı səbəbdən müraciət etmələrinə də aydınlıq gətiriblər:
“Belə təəssürat yaranır ki, “Azərsu” ümumiyyətlə heç bir qanuna, qaydaya, göstərişə tabe olmayan qurumdur. Çünki saymazyana davranışları bunu göstərir. Biz də sizə müraciət etdik ki, bəlkə, problemimiz mediada işıqlandırıldıqdan sonra ya “Azərsu”da vicdan oyanar, ya da bu quruma nəzarət edən digər dövlət orqanları əməli tədbirlər görülməsinə dair müvafiq göstərişlər verərlər”.
