Ölkədə 3-cü “Azərbaycanda Özbəkistan mətbəxi həftəsi” festivalına start verilib. Festival 10 sentyabr 2022-ci il tarixindən etibarən Özbəkistan Respublikasının Azərbaycan Respublikasındakı Səfirliyi və “Turizmin və milli mətbəxin inkişafına dəstək” İctimai Birliyinin təşkilatçılığı ilə keçirilir. Bu haqda bu gün, 12 sentyabr tarixində Bakuplus.az məlumat verir.
Azərbaycanda Özbəkistan mətbəxi həftəsi hər il peşəkar və həvəskar kulinariya mütəxəssisləri, fud-blogerlər, həmçinin Facebook sosial şəbəkəsində Azeri Home Chef qrupunun üzvləri arasında müsabiqə şəklində aparılır.
Müsabiqənin şərtlərinə əsasən, birinci - onlayn mərhələdə onun iştirakçıları özbək yeməklərini bişirməli, onları gözəl bəzəməli, prosesi foto və ya videoya çəkərək Facebook sosial şəbəkəsindəki səhifələrində dərc etməlidirlər.
Müsabiqənin birinci mərhələsinin nəticələrinə əsasən, Özbəkistan səfirliyinin diplomatlarından, Bakıdakı restoranlarda çalışan özbək aşpazlarından və “Turizmin və milli mətbəxin inkişafına dəstək” İctimai Birliyinin nümayəndələrindən ibarət münsiflər heyətinin iştirakı ilə təam müəlliflərindən finalçılar seçiləcək.
Müsabiqənin final mərhələsi 22 sentyabr 2022-ci il tarixində “Şərq bazarı”nda keçiriləcək. Finalda müsabiqə iştirakçıları qeyri-adi özbək yeməklərini təqdim edəcəklər. Bu mərhələ konsert proqramı, viktorinalar və tədbirin təşkilatçılarının təamları ilə müşayiət olunacaq. Bütün finalçıları müsabiqənin sponsorlarından hədiyyələr gözləyir. Əsas mükafat isə Özbəkistana səyahət olacaq.
