Bakının Bilgəh qəsəbəsində yerləşən “Daçniki” adlanan çimərliyinə giriş tam bağlanıb. Bu haqda bu gün, 17 mart tarixində Bakuplus.az Qafqazinfo-ya istinadən məlumat verir.
Şahidlərin sözlərinə görə, orada əvvəllər dəmir barmaqlıqlar qoyulmuşdursa, indi hörgü işləri görülür. Deyilir ki, oraya daş töküb hasar çəkiblər.
Sabunçu Rayon İcra Hakimiyyətinin nümayəndəsi Murad Cənnətovun sözlərinə görə, həmin ərazidə həqiqətən tikinti işləri gedir.
“Həmin yerdən bağ sakinlərinin istifadə etməsi, gediş-gəlişlərinin təmin olunması üçün qapı quraşdırılır. Hazırda qapı hörgüsünün işləri görülür. Qapıdan sırf həmin ərazidə yerləşən bağ sakinləri istifadə edə biləcək. Orada daha əvvəlki kimi maşınların dayanmasına qətiyyən icazə verilməyəcək”, - deyə Murad Cənnətov bildirib. O, həmçinin əlavə edib ki, bu sahə çimərlik ərazisi olmadığından, Fövqəladə Hallar Nazirliyi burada çimməyi qadağan edən nişanlar quraşdırıb.
