İyunun 10-12-də Bakıda keçiriləcək Formula 1 Azərbaycan Qran Prisi üçün tribunaların tikintisinə başlanılıb. Bu haqda bu gün, 20 aprel tarixində Report Bakı Şəhər Halqası Əməliyyat Şirkətinin (Baku City Circuit) Bakı mərhələsi üçün obyektlərin tikintisi şöbəsinin rəisi Tom Butçerə istinadən məlumat verib.
Butçer keçən həftə beton blok işlərinə başlandığını bildirib: "Bundan əlavə, təhlükəsizlik baryerlərinin quraşdırılması ilə bağlı işlərə başlanılıb. İşlərlə bağlı yollarda müəyyən tıxaclar yarana bilər. Buna görə yerli sakinlərdən üzr istəyirik. Amma yarış üçün tikinti işlərini aparmalıyıq".
O, həmçinin bütün yerli azarkeşləri yarışa dəvət edib.
Formula 1 qran-prisi Bakıda 2016-cı ildən etibarən keçirilir. Koronavirus pandemiyası səbəbindən Bakıdakı yarış 2020-ci ildə ləğv olunmuş, 2021-ci ildə isə azarkeşsiz keçirilmişdir.
