Paytaxtın Yasamal rayonu, Mirzəağa Əliyev küçəsində vətəndaşlar hər gün söküntü işləri tamamlanmayan binanın altından hərəkət edirlər. Təhlükəsizlik üçün ərazi hasara alınmayıb. Bu haqda 27 iyun tarixində ATV Xəbər reportaj hazırlayıb.
Həmin təhlükəli vəziyyət Qış parkına yaxın olan ərazidə yaranıb. Belə ki, 3 mərtəbəli yaşayış binasının iki mərtəbəsinin eyvan və pəncərələri tamamilə sökülüb. Bina müəyyən müddətdir qəzalı vəziyyətdə qalır. Nəticədə isə səkidən istifadə edən piyadalar təhlükə ilə üz-üzə qalırlar.
Ərazidə yaşayanlar deyir ki, bina bir neçə ildir belə vəziyyətdədir. Qəzalı olmasına, insanlar üçün təhlükə yaratmasına baxmayaraq, bu günədək heç bir tədbir görülməyib. Sakinlər məcbur qalıb bu səkidən istifadə edirlər.
Yasamal rayon İcra Hakimiyyətindən bildirildi ki, Fövqəladə Hallar Nazirliyi binanın qəzalı vəziyyətdə olması barədə rəy verib. 2019-cu ildə kompensasiya ödənilməklə sakinlərin bir hissəsi köçürülüb. Lakin 7 ailə kompensasiya məbləği ilə razılaşmadığı üçün məhkəməyə müraciət edib. Hazırda məhkəmə prosesi davam edir. Bu səbəbdən də yaşayış binası sökülə bilməz. Piyadalar üçün yaranan təhlükəni aradan qaldırmaq üçün isə yaxın günlərdə binaya qoruyucu konstruksiyaların qoyulması nəzərdə tutulub.
