Bakıda 15 min manatlıq qızıl oğurlayan şəxslər saxlanıb. Hadisə paytaxtın Yasamal rayonunda qeydə alınıb. Bu haqda 22 noyabr tarixində Daxili İşlər Nazirliyinin mətbuat xidməti məlumat yayıb.
Həyata keçirilən əməliyyat nəticəsində Yasamal rayonu ərazisində bir evdən 15 min manatlıq qızıl, eləcə də yeni tikilməkdə olan binalarda ustaların təmir-tikinti alətlərini oğurlayan Vüsal Rzayev və Orxan Hüseynov tutularaq istintaqa təhvil verilib.
Vüsal Rzayev Yasamal rayonunda yerləşən evlərdən birindən dəyəri 15 min manat olan qızıl-zinət əşyaları oğurlamaqda şübhəli bilinir. Onun qızıl-zinət əşyalarını dəyər-dəyməzinə, yəni 6000 manata sataraq şəxsi ehtiyacları üçün xərclədiyi məlum olub.
Silsilə oğurluqlar edən əvvəllər məhkum olunmuş Orxan Hüseynov Yeni Yasamal ərazisində yeni tikilməkdə olan binalarda usta işləyən şəxslərin təmir-tikinti alətlərini, həmçinin qeyd edilən ərazidə yerləşən mağazalardan birindən pul və tütün məmulatları oğurladığına görə saxlanıb.
Qeyd edilən faktlarla bağlı Vüsal Rzayev və Orxan Hüseynov barəsində Yasamal Rayon Polis İdarəsinin İstintaq Şöbəsində araşdırmalar davam etdirilir.
