1916-cı ilin fevral ayında Bakı şəhərində qıtlığa və qiymət artımına qarşı qadınların qiyamı baş verib.
Bakuplus.az xəbər verir ki, sözügedən dövrdə şəhərdə ərzaq qiymətlərinin xeyli bahalaşması, altı nəfərin ət ticarəti məqsədilə sindikat yaratması narazılığa səbəb olmuşdu. Sindikat Türkmənistandan ucuz qiymətə alınan qoyunları Bakıda bir neçə qat bahasına satırmış. Bu isə bütün bazara təsir edir, qiymətlərin 4-5 dəfə artmasına səbəb olmuşdu. Statistikaya baxsaq, çörəyin qiyməti son iki ildə 266 faiz, südün qiyməti 305 faiz, ətin qiyməti 327 faiz, düyünün qiyməti 355 faiz, ərinmiş yağın qiyməti isə 520 faiz artıb. Bununla yanaşı, düyü, toyuq, yumurta və digər ərzaq məhsullarının da qiyməti bir neçə dəfə artmışdı.
Bu qiymət artımı şəhərdə kasıb təbəqə arasında ölüm hallarının artmasına səbəb olur. Buğda qıtlığı isə dəyirmanların əksərinin fəaliyyətsizliyi ilə nəticələnir. Bundan bezən Bakı qadınları fevral ayının 14-də qiyama başlayır. Bu, Zaqafqaziyada qadınların ilk etirazı və çıxışı idi. Hadisə yerinə altı polis və yanğın dəstələri göndərilsə də izdiham yatırıla bilmir. Əməliyyata rəhbərlik edən Martınovun əmri ilə Kaspi küçəsindəki böyük şərab anbarına hücum edən qadınlara 2 dəfə yayılım atəşi açılır. Atlı kazaklar Qaraşəhər körpüsünün yanında 1000 nəfərlik qadın izdihamını dağıdırlar. Bu zaman 4 nəfər həyatını itirir. Qadınlar qarşılarına çıxan alverçiləri, otel müdürlərini, pristavları hətda onları evə çağıran ərlərini belə meydanda döyüb əzirmişlər. 3 gün ərzində onlar 116 ərzaq, 70-ə qədər parça, paltar, geyim mağazasına və anbarına basqın edib talan edilib.
Rəsmi rəqəmlərə görə, etirazlar zamanı 64 nəfər ölüb. Şəhərə isə 2 milyon 957 min manat ziyan dəyir.
