Paytaxtın Sabunçu rayonu, Zabrat qəsəbəsi ərazisində tanışı Məhəmməd Əliyevi bir yumruqla öldürən Rəhman Əzimova Bakı Ağır Cinayətlər Məhkəməsində hökm oxunub. Bu haqda məlumatı Bakuplus bu gün, 26 may tarixində Qafqazinfo.az-a istinadən verir.
Belə ki, hadisə 27 noyabr 2020-ci ildə baş vermişdir. 57 yaşlı Rəhman Əzimov tanışı, 59 yaşlı Məhəmməd Əliyev və Rövşən adlı şəxslə kafedə oturarkən aralarında mübahisə yaranıb. Daha sonra münaqişə marketin önündə davam edib. R.Əzimov M.Əliyevə “niyə məni Rövşənin yanında təhqir edirsən?” sualına mərhum “yaxşı edirəm, sən kimsən ki” deyə cavab verib. Bundan sonra Əzimov bir yumruqla onun çənəsindən vurub və çıxıb getmək istədikdə Rövşənin qaçaraq “buna nə oldu” deməsini eşidib.
R.Əzimov ifadəsində M.Əliyevin bir yumruqla öləcəyinə inanmadığını, “artistlik” etdiyini fikirləşdiyini söyləyib. Bu səbəbdən də evə gedib.
Lakin mərhum M.Əliyevin oğlu bildirib ki, hadisə anbaan “Ruslan” marketin kameralarına düşüb. “Yumruqdan sonra R.Əzimov ayağı ilə atamın başına bir neçə zərbə də yetirib”, - deyə o bildirib.
Bakı Ağır Cinayətlər Məhkəməsinin hökmü əsasında Rəhman Əzizov 9 il 6 ay müddətinə azadlıqdan məhrum olunub.
