Bakıda ağacların sanitar kəsilməsinə başlanılıb. Bu haqda bu gün, 13 aprel tarixində Bakuplus.az Bakı İcra Hakimiyyətinin mətbuat xidmətinə istinadən məlumat verir.
Bildirilir ki, bu, yaşıllıqlara təsir edən xəstəliklərin yayılmasının qarşısını almaq məqsədilə Bakı Şəhər Yaşıllaşdırma İdarəsinin əməkdaşları tərəfindən həyata keçirilən zəruri prosedurdur.
Bakı Şəhər İcra Hakimiyyətindən verilən məlumata görə, sanitar qırmalara başlamazdan əvvəl paytaxtın yaşıl təsərrüfatının vəziyyəti ilə bağlı monitorinqlər aparılıb. Monitorinqlərin nəticələrinə əsasən, Mərdəkan və Buzovna qəsəbələrində, eləcə də Bayıl, Fəxri Xiyabanda, Mehdi Hüseyn küçəsində, AzTV-nin inzibati binasının yaxınlığında bitən 2000 ağac kəsiləcək.
“Xəstə ağacların kəsilməsi bir neçə mərhələdə aparılır. Əvvəlcə ağaclar kəsilir və ya kökündən çıxarılır. Sonra ərazi dezinfeksiya edilir və göbələk xəstəliklərinə daha davamlı olan yeni tinglər əkilir”, - deyə mətbuat xidmətindən bildirilib.
Bakı Şəhər İH vətəndaşların nəzərinə çatdırır ki, paytaxt ərazisində aparılan sanitar ağac kəsimləri zəruri tədbirdir. Müvafiq tədbirlər görülməsə, şəhər yaşıllıqsız qalacaq.
