Bakı Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Xəlil Nəbiyevin cinayət işi üzrə məhkəmə iclası keçirilib.
Pravda.az-ın əldə etdiyi məlumata görə, hakim Elnur Nuriyevin sədrliyi ilə keçirilən prosesdə hökm oxunub.
İstintaq materiallarına əsasən, hadisə 2025-ci ildə Bakı şəhərinin Xəzər rayonu, Binə qəsəbəsi ərazisində baş verib.
2010-cu il təvəllüdlü, yetkinlik yaşına çatmayan Xəlil Nəbiyev qəsəbə ərazisində yerləşən hasarlanmış boş sahədə 2009-cu il təvəllüdlü, zərərçəkmiş Hacı Qurbanovla mübahisə edib. Mübahisəyə səbəb kimi zərərçəkmiş şəxsin Xəyalə adlı xanımın ünvanına nalayiq ifadələr işlətməsi olub.
İstintaqla müəyyən edilib ki, Xəlil Hacını cəzalandırmaq niyyəti ilə əvvəlcədən yaşadığı evdən götürdüyü bıçağı üzərində gizlədərək hadisə yerinə gətirib. Mübahisə zamanı o, qəfil Hacıya zərbə endirib.
Məhkəmə baxışı zamanı iş üzrə dövlət ittihamçısının, zərərçəkmiş şəxsin, təqsirləndirilən şəxsin və onun müdafiəçisinin mövqeləri dinlənilib, həmçinin təqdim olunmuş sübutlar tədqiq edilib.
Məhkəmənin hökmü ilə Xəlilə şərti cəza verilib.
Qeyd edək ki, ad, soyadlar şərti verilib.
