Sürücülər parklanma yerlərində dayanan zaman "AzParking" mobil tətbiqi ilə və ya SMS vasitəsilə müddətin başladılmasını aktiv etməlidirlər. Bunu etməyən sürücülər İnzibati Xətalar Məcəlləsinin 346-1.1 maddəsilə 20 manat məbləğində cərimə oluna bilərlər.
Avtosfer.az xəbər verir ki, ödənişli parklanma yerlərində axşam saat 22:00-dan səhər saat 07:00-dək, eləcə də həftənin bazar günləri ödəniş tələb olunmur. Bəs ödəniş tələb olunmadığı vaxtlarda dayanma müddətinin başladılması aktivləşdirilməlidirmi?
Sürücülərə qaranlıq qalan bu məsələyə AYNA-nın mətbuat katibi Tural Orucov aydınlıq gətirib. O bildirib ki, axşam saat 22:00-dan səhər 07:00-dək, həmçinin həftənin bazar günləri parklanma tam ödənişsiz olduğu üçün müddətin başladılması ilə bağlı "AzParking" mobil tətbiqini aktivləşdirməyə ehtiyac yoxdur.
Nəzərə almaq lazımdır ki, bu qaydalar yalnız yerüstü parklanma nöqtələrinə aiddir. Yeraltı parkinqlərdə qaydalar dəyişmir. Yəni hansı saatdan və ya hansı gündən asılı olmayaraq yeraltı parkinqlərdə qiymət mövcud taariflərə uyğun hesablanır və ödəniş tələb olunur.
