Bakı Dövlət Universitetinin (BDU) ən yaşlı tələbəsi 51 yaşlı Anaxanım Dadaşevadır.
Modern.az xəbər verir ki, o, BDU-nun Geologiya fakültəsinin "Mədən mühəndisliyi" ixtisasının I kurs tələbəsidir. Anaxanım Dadaşeva qadın üçün çətin sayılan bir peşəyə sahib olmaq arzusuyla ali təhsil almağa qərar verib. BDU-nun mətbuat xidmətinin məlumatına görə, Anaxanım “Oxumaq heç vaxt gec deyil” prinsipi ilə ali təhsil alır və öz əzmi ilə heyrət doğurur.
Öncə Azərbaycan Dövlət Neft və Sənaye Universitetinin Bakı Neft-Energetika Kollecinə qəbul olan Anaxanım, 2019-cu ildən sonra subbakalavrların universitetlərə imtahansız qəbul qərarının verilməsi ilə ali təhsilini davam etdirmək qərarı alıb. O, qızının ailə həyatı qurmasından və oğlunun iş sahibi olmasından sonra yenidən tələbə olmaq arzusunu reallaşdırıb.
