“Vaxtilə jurnallarda, qəzetlərdə hoqqalar verən müğənni abır-həyasından danışır. Bunun özü də bir reytinqdir. Çünki danışığı ilə qıcıq yaradır. Cavanlar bilməsə də, köhnələr bilir ki, o, Biləcəridə filan klubda, Binəqədidə, Nizamidə hoqqa çıxaran bir adam idi. İndi isə namus, qeyrətdən danışır”.
Bu sözləri tanınmış aparıcı Amil Xəlil “Yeni Sabah”a açıqlamasında bildirib.
Amil Xəlil deyib ki, televiziyada reytinq çox önəmlidir: “Reytinq olmasa, onu hiss edirsən. Bizdə söyülən aparıcı birinci yerdə olur. Sırada ilk üçlükdə kimdirsə, bilin ki, həmin adam çox söyülür. Amma reytinqdə ilk yerdədir. Bunun şou-biznes aləminə də təsiri var. Adam yanıb-tökülür”.
Televiziya ilə bağlı problemlərə toxunan tanınmış aparıcı, şoumen Kamran Həsənli isə bu fikirdədir ki, indiki efirləri yerli-dibli silib hər şeyi yenidən yaratmaq lazımdır: “Ona görə ki, bizim millətimizə, adımıza uyğun bir mənzərə olsun. İndiki televiziya əyri güzgüdür. Millətimizi biabır edir. Nəinki hazırkı aparıcıların davamçılarını yenidən efirlərə dəvət etmək, hamısını ləğv etmək lazımdır”.
