11 oktyabr 2020-ci ildə Ermənistan silahlı qüvvələri Azərbaycanın ikinci böyük şəhəri olan Gəncəni dördüncü dəfə raket atəşinə tutdu. Gecə saat 02:00-da atılan raket “Qələbə parkı”nın ətrafında yerləşən yaşayış ərazisinə düşmüş və binaları dağıtmışdı. Nəticədə dinc sakinlərdən 10 nəfər həlak olmuş, 34 nəfər yaralanmışdı.
Bu raket hücumları nəticəsində 31 mənzil tamamilə uçmuş, hadisə yerindəki və onun yaxınlığındakı obyektlərə ciddi ziyan dəymişdir. Hücumdan ümumilikdə 205 nəfərin yaşadığı 95 mənzil qəzalı vəziyyətə düşmüşdür.
Azərbaycan Müdafiə Nazirliyinin məlumatına görə, şəhər Ermənistanın Berd rayonunda yerləşən erməni silahlı qüvvələri tərəfindən “Skad” tipli ballistik raketlərlə atəşə tutulmuşdur.
Ümumilikdə Gəncə şəhərinə endirilmiş raket zərbələri nəticəsində 6-sı uşaq və yeniyetmə olmaqla 26 nəfər həlak olmuş, 29-u uşaq olmaqla 130-a yaxın insan müxtəlif dərəcəli bədən xəsarətləri almışdır. Bu hadisələr zamanı 3 ailənin üzvü olan 4 uşaq hər iki valideynini itirmişdir.
