Azərbaycana avtomobil idxalı 10 faiz azalıb. Bu ilin yanvar-iyul aylarında ölkəyə 944 milyon ABŞ dolları dəyərində 51 179 ədəd müxtəlif təyinatlı avtomobil idxal edilib.
Dövlət Gömrük Komitəsinin (DGK) məlumatına əsasən, bu, ötən ilin eyni dövrü ilə müqayisədə müvafiq olaraq 4,8 % çox və 9,8 % azdır.
Maraqlıdır, bu azalmanın səbəbi nədir? Ölkəmizdə avtomobillərə maraq azalıb?
Mövzu ilə bağlı BakuPlus.az-a açıqlama verən nəqliyyat məsələləri üzrə ekspert Yasin Mustafayevin sözlərinə görə, ölkəyə gətirilən nəqliyyat vasitələrinin buraxılış ilinə qoyulan məhdudiyyətlər, elektrikli avtomobillərlə bağlı aparılan təşviqat idxala, qiymətlərə birbaşa təsir edir:
“İki aya yaxındır ki, Çindən gətirilən avtomobillərin bir hissəsi Rusiya sərhədində qalıb. Gətirən şirkətlər müəyyən xətalara yol veriblər. Ucuz başa gəlsin deyə müəyyən əməliyyatlar ediblər. Qayda pozuntusuna görə də 2000 nəqliyyat vasitəsi sərhəddə qalıb. Bu statistikaya da təsir göstərib”.
Y.Mustafayev qeyd edib ki, avtomobillərin əksəriyyəti Çindən gətirilir:
“Biz əvvəllər Avropadan, Gürcüstandan və Amerikadan gətirirdik. İndi isə hibrid avtomobillər Çindən gətirilir. Bu da rəqəmlərə ciddi təsir göstərir”.
İqtisadçı-ekspert Fuad İbrahimov isə qeyd edib ki, avtomobillərə maraq azalmayıb:
“Bu ilin doqquz ayı ərzində ölkəmizə 66 285 ədəd nəqliyyat vasitəsi idxal olunub. 2023-cü ildə isə 72 883 ədəd nəqliyyat vasitəsi idxal edilmişdi. 6 min avtomobil azalma olub. Kəskin artım elektromobillərin xeyrinə olub. Coğrafiyasında da dəyişilmə baş verib. Əvvəl Gürcüstandan, Amerikadan və Avropadan gətirilirdi. İndi isə Çindən daha çox idxal olunur. Bu da dövrün tələbədir. Qiymət və qənaət baxımından daha sərfəlidir.
Maraq azalmayıb. Azalmanın səbəblərin nəzərə almaq lazımdır. Bazarda kifayət qədər satılmayan avtomobillər var. Anbarlar doludur. İş adamları avtomobillər idxal edir. Azalma da tələbata uyğun tənzimlənməlidir. Gətirilən avtomobillərin satılmaması və illəri də nəzərə alınmalıdır. Azərbaycana istehsalı 10 ildən daha çox olan avtomobillərin gətirilməsi qadağan edilib. Bu baxımdan alış üçün əlçatanlıq kifayət qədər olmur. Xalq olaraq avtomobillərə maraq azalmayıb. Şəhərdə olan tıxaclar bunun bariz nümunəsidir”.
Nəzrin Vahid
