Vətən müharibəsi dövründə Gəncə şəhərinin Ermənistan Silahlı Qüvvələri tərəfindən beşinci dəfə raket atəşinə tutulmasından 4 il ötür.
Bakuplus.az xəbər verir ki, 2020-ci ilin oktyabrın 17-də, təxminən yerli vaxtla 01:00-da ermənilər yenə “Skad” ballistik raketləri ilə Gəncəni atəşə tutublar. Raketlərin əhalinin sıx yaşadığı yeri hədəfə alması nəticəsində 15 nəfər həlak olub, 54 nəfər yaralanıb. Hadisə zamanı 20 ev dağılıb, başqa tikililər ciddi ziyan görüb.
Beləliklə, Gəncə şəhərinə endirilən raket zərbələri nəticəsində 6-sı uşaq və yeniyetmə olmaqla, ümumilikdə 26 nəfər həlak olub, 29-u uşaq olmaqla, ümumilikdə 130-a yaxın insan müxtəlif dərəcəli bədən xəsarətləri alıb. Bu hadisələr zamanı 3 ailənin üzvü olan 4 uşaq hər iki valideynini itirib.
Xatırladaq ki, İkinci Qarabağ müharibəsində ümumilikdə Ermənistanın hərbi təcavüzü nəticəsində 12-si uşaq, 27-si qadın olmaqla 93 mülki şəxs həlak olub, 454 mülki vətəndaş yaralanıb, ümumilikdə 12 292 yaşayış və qeyri yaşayış sahəsinə, 288 nəqliyyat vasitəsinə ziyan dəyib, 1 018 fermer təsərrüfatı üzrə zərər faktı aşkar edilib.
