22 yanvar Azərbaycan teatr və kino aktyoru, Azərbaycanın xalq artisti Hacı İsmayılovun doğum günüdür.
Hacı Məcid oğlu İsmayılov 22 yanvar 1944-cü ildə Bakı şəhərində anadan olub.
1963-cü ildə Mirzağa Əliyev adına Azərbaycan Dövlət Teatr İnstitutunun dram və kino aktyorluğu fakültəsinə daxil olub.
Sumqayıt Dövlət Dram Teatrına dəvət alıb və 1968-ci il sentyabr ayının 2-də truppanın üzvü olub.
Aktyor “Azərbaycanfilm” kinostudiyasında ilk dəfə “Ad günü” filmində Mustafa rolunda çəkilib, bu rolla böyük uğur qazanıb və Respublikanın Dövlət mükafatı laureatı adına layiq görülüb . Bundan sonra “Bağlı qapı arxasında” (Alik), “Yol hadisəsi” (Mürşüd), “Ölsəm, bağışla” (Tağı), “Fəryad” (Rövşən), “Bəyin oğurlanması” (Tağı), “Özgə həyat” (Qasımov), “Həm ticarət, həm ziyarət” (Mustafa müəllim) filmlərində müxtəlif xarakterli rollara çəkilib.
Azərbaycan Dövlət Televiziyasında hazırlanmış çoxlu əsərlərdə iştirak edib. Hacı İsmayılov V.Səmədoğlunun “Yaşıl eynəkli adam” (Qafar), M.Süleymanlının “Fatehlərin divanı” (Qazi), Ü.Hacıbəyovun “Ordan- burdan” (Qoçu Gülbala), İ.Əfəndiyevin “Atayevlər ailəsində” (Xuruşid), A.Məmmədovun “Kişilər” (Səməndər), A.Babayevin “Nekroloq” (Fərəc) tamaşalarında dramatik və tipik obrazlar yaradıb.
Məşhur kino və teatr aktyoru Hacı İsmayılov sənətdə qazandığı nailiyyətlərə görə 17 may 1989-cu ildə Azərbaycan Respublikasının Əməkdar Artisti və 19 dekabr 2000-ci ildə Xalq Artisti fəxri adları ilə təltif olunub.
Prezident təqaüdçüsüdür.
