Şüurlu insan yüksəkgərginlikli naqilə əl vurarmı? Əsla! Fiziki ölüm qorxusu bunu labüd edir. Eynilə özünü kişi hesab edən də heç zaman qadına əl qaldırmamalıdır. Fiziki ölüm olmasa da, mənəviyyatın və vicdanın son nəfəsi deməkdir bu.
Bu günlərdə ən çox müzakirə edilən hadisə Bakıda zahirən kişiyə bənzər məxluqun orta yaşlı xanımı yumruqlamasıdır. Əlbəttə ki, dəhşətli hadisədir. Amma bir məsələ də var: sosial şəbəkələrdə kifayət qədər insan "görəsən qadın nə edib ki, kişi onu döymək qərarına gəlib" sualını verir. Və, düzü, tərəddüd edirsən: bu məxluqun xanıma yumruq vurmasımı, ya insanların belə müzakirələrə yol açmasımı daha dəhşətlidir. Axı biz nə zaman, tarixin hansı döngəsində səhv istiqamət aldıq ki, bir zamanlar kişiliyin, qadınlara hörmətin rəmzi olan azərbaycanlı kişisi belə hala gəldi? Kimsə də günahı bəzi müasir qadınların davranışında axtarmasın. Kişi ilk növbədə öz kişiliyinə hörmət qoymalıdır. Qadına əl qaldırmamağı öz kişiliyinə sığışdırmamalıdır.
İnsan dünyaya gələrkən cinsini seçmək iqtidarında deyil. Amma fizioloji olaraq həyata kişi kimi göz açmaq hələ kişi olmaq anlamına gəlmir. Kişi olmaq, kişi adlanmaq haqqını qazanmaq lazımdır. Hər gün, hər davranışınla. Bunu bacarmayanlar isə artıq kişi yox, biokütlə, biovarlıqlardır.
Kişilər! Xanımlara xanım kimi davranın ki, kişilik statusunuz sual altına düşməsin! Kişi olun!
Kamran Rza
