Sosial şəbəkələrdə kredit kartlarının verilmə qaydalarının sərtləşdiriləcəyi ilə bağlı iddialar dolaşır.
Son illər kredit kartlarına olan tələbat səbəbindən sözügedən məsələ insanlar arasında narahatlığa səbəb olub. Kredit kartlarına olan tələbatın artması, bəzi hallarda istifadəçilərin borclanmasına da səbəb olur. Vətəndaşların yaranan borcu ödəmədə çətinliklərlə qarşılaşması (bu sıraya əsasən maliyyə çətinliyi aiddir) bankların bu sahədə yeni tənzimləmələr tətbiq etməsini gündəmə gətirir.
Bəs görəsən, kredit kartlarına tətbiq ediləcək yeni qaydalar insanların maliyyə yükünü azalda biləcəkmi?
Mövzu ilə bağlı İnsanoid.com-a açıqlama verən bank məsələləri üzrə ekspert Əkrəm Həsənovun sözlərinə görə, kreditin verilmə qaydaları sərtləşdiriləcək:
“Sərtləşdirilmə yalnız kredit kartlarına aid deyil. Bütövlükdə kreditlərin verilməsində də qaydaların sərtləşdiriləcəyi bildirilir. Kredit kartları sadəcə bu dəqiqə ən geniş yayılmış bank alətlərindən biridir. Kredit kartları yalnız kreditdən istifadə alətidir.
Kreditin geri qaytarılmasında bəzi problemlər yaranır. Bu da krediti götürən şəxsin ödəniş qabiliyyətinin aşağı olduğunu göstərir. Bizdə banklar kredit verəndə kredit götürənin aylıq gəlirinə, kredit tarixçəsinə diqqət yetirirlər. Bununla yanaşı, kredit üçün müraciət edən şəxsin öhdəliyində olan digər ödənişlərə də baxılır. Əgər banka müraciət edən şəxsin gəliri də, xərcləri də çoxdursa, bu zaman qurum kredit verməkdən imtina edə bilər. Yeni sərtləşdirmə qaydaları ilə isə banklar kredit kartı verərkən müştərilərin maliyyə vəziyyətini daha diqqətlə qiymətləndirməyə başlayacaqlar. Bu, gələcəkdə maliyyə çətinliklərinin qarşısını almaq üçün bir addım ola bilər. Hər halda, vətəndaşların bu yeni qaydaları izləməsi və maliyyə planlamalarını düzgün aparması önəmlidir”.
Qeyd edək ki, kredit kartlarının verilmə şərtlərinin sərtləşdirilməsi, insanların maliyyə yükünü azaltmaq və borc müddətini daha idarəolunan etmək məqsədini güdür. Bu, eyni zamanda bankların risklərini azaltmağa da kömək edəcək. Belə bir vəziyyət, kredit kartı alan şəxslərin daha diqqətli olmalarına və borc məsuliyyətlərini daha yaxşı idarə etmələrinə səbəb ola bilər.
Nəzrin Vahid
