Qaradağ rayonunda yolda sürət həddinin dəyişdirilməsi sürücülərin narazılığına səbəb olub. Bu haqda 7 oktyabr tarixində Qafqazinfo məlumat verib.
Belə ki, Sahil qəsəbəsi, “Qaradağ market”in qarşısında əvvəllər saatda 90 kilometr olan sürət həddi 70-ə endirilib. Sürücülər sürət həddinin radara az qalmış bu formada dəyişdirilməsinin doğru olmadığını deyirlər.
Faktla bağlı Baş Dövlət Yol Polisi İdarəsi açıqlama verib:
“Ərazidə sürət həddinin azaldılması ilə ağır yol-nəqliyyat hadisələrinin başvermə riskinin azalması nəzərə alınaraq, tərəfimizdən müvafiq təklifə müsbət rəy verilib və Bakı Nəqliyyat Agentliyi tərəfindən mövcud yol nişanı quraşdırılıb”.
Mövcud qanunvericiliyə görə, radara 150-1000 metr qalmış sürət həddini bildirən yol nişanı quraşdırıla bilər.
