“AzParkinq” dayancaqlarında parketmə prosesinin düzgün təşkili sürücülərin rahatlığını artırmaq və park yerlərindən səmərəli istifadə etmək üçün vacibdir. Hazırda sistemdə sürücülər avtomobillərini park edərkən “start” düyməsini basmadığı halda cərimə yazılır, lakin oranı tərk edərkən “stop” düyməsini unudaraq sıxmadıqları təqdirdə isə avtomobil hələ də parkinqdə görünür.
Bu vəziyyət, əlavə ödənişin tətbiq olunmasına səbəb olur. Məsələ ilə bağlı sürücülərdən Bakuplus.az-a daxil olan şikayətdə bildirilib ki, bu vəziyyət, həmçinin park yerinin dolu görünməsi ilə də nəticələnir.
Həmin səbəbdən, avtomatik sistemlərin tətbiqi ilə parketmə müddətinin avtomatik olaraq dayandırılması vacibdir. Belə bir tənzimləmə ilə, avtomobil dayancaqdan çıxarkən ödənişin anında dayandırılması təmin olunacaq, bu həm sürücüləri əlavə xərcdən azad edəcək, həm də park yerlərinin daha səmərəli istifadəsinə şərait yaradacaqdır.
Mövzu ilə əlaqədar BakuPlus.az-ın əməkdaşı nəqliyyat məsələləri üzrə ekspert Eldəniz Cəfərov ilə danışıb.
Onun sözlərinə görə, əvvəlki illərə nisbətən “AzParkinq” yaradılandan sonra parklanmada səliqə-sahman, nizam-intizam meydana gəlib:
“Parklanma gözətçiləri yaxınlaşıb, insanları incitmirlər. Ödəmələr qeyri-nağd həyata keçirilir. Bu da maliyyə şəffaflığını artırır. Hazırda“AzParkinq” parklanma nəzarətçisi kimi çalışan insanlara maaş verilir. Onlar gələcəkdə təqaüd də ala biləcəklər”.
E.Cəfərov qeyd edib ki, “AzParkinq” mobil tətbiqi təkmilləşdirilməlidir:
“AzParkinq” ilə bağlı şikayətlər var. Bu da parklanma müddətinin sonlandırılmasının yaddan çıxması ilə əlaqədardır. Burada da “AzParkinq” mobil tətbiqində xəbərdaredici mesaj gəlir. Ola bilər ki, vətəndaş özü “AzParkinq” xəbərdaredici mesaj bölümünü bağlayıb. Onu açması məsləhətdir.
“AzParkinq” mobil tətbiqi təkmilləşdirilməli, daha da optimal və funksional olmalıdır. Yenilənməlidir. Elə olmalıdır ki, istifadə daha asan olsun. Belə problemlər də yaşanmasın”.
Məsələ ilə bağlı Azərbaycan Yerüstü Nəqliyyat Agentliyindən (AYNA) BakuPlus.az-ın sorğusuna cavab olaraq bildirilib ki, qaydalara əsasən, avtomobil ödənişli parklanma məntəqəsinə daxil olan kimi vaxt açılmalı, bitəndə isə sürücü tərəfindən sonlandırılmalıdır:
“Həm açmaq, həm də sonlandırmaq - bu, bilavasitə sürücünün öhdəliyinə düşən məsələdir”.
Nəzrin Vahid
