Paytaxt bazarlarında balığın və digər məhsulların qiymətləri artıb. Bu haqda bu gün, 21 fevral tarixində Bakuplus.az ATV-yə istinadən məlumat verir.
Son bir ayda növündən asılı olaraq, balığın qiymətində 1 manatdan 5 manata qədər yüksəliş müşahidə olunur. Satıcılar deyirlər ki, əvvəlki aylarla müqayisədə digər məhsulların qiymətində artımın olması balıq bazarına da təsir edir.
Balığın qiymətinin artması səbəbini izah edən mütəxəssislər deyirlər ki, bu, həm də ovlanmaya qoyulan qadağa ilə bağlıdır. Digər tərəfdən mövsümlə bağlı dambalarda da balıq azalıb.
Eyni zamanda Novruz bayramı ərəfəsinin olması da qiymətlərə təsir edir. Belə ki, bir çox bölgələrdə, xüsusilə İlaxır çərşənbədə balıq süfrələrin əsas bəzəyidir. Və bu məhsulu hər kəs almağa çalışır.
Paytaxt bazarlarında balıqla yanaşı, toyuğun da qiymətində artım müşahidə olunur. Belə ki, diri broyler toyuqlarında 1-2 manat, kənd toyuqlarında isə 4 manata kimi artım var. Satıcılar toyuğun qiymətinin artmasını yemin bahalaşması ilə izah edirlər.
İlin-günün bu fəslində pomidor, xiyarı da ucuz almaq mümkünsüzdür. Son bir ayda bu tərəvəzlərin qiyməti kiloqrama görə 1-2 manat arasında yüksəlib.
Mövzuya münasibət olaraq kənd təsərrüfatı nazirliyindən bildirildi ki, pomidor və xiyarın qiymətinin yüksəlməsi məhsulun ölkədə mövsümlə əlaqədar az olması və daha çox üstünlüyün ixraca verilməsi ilə bağlıdır.
