Bakının Yasamal rayonunda yerləşən Bravo supermarketində istifadəyə yararsız batareyaların toplanması məntəqəsi açılıb. Bu haqda məlumat sosial şəbəkələrdə yayılıb.
Yayılan məlumata əsasən, həmin məntəqə EcoFront təşkilatı tərəfindən yaradılıb. Yığılan batareyalar utilizasiya olunması üçün “Təmiz Şəhər” ASC-yə təhvil verilir.
Məntəqə Həsən Bəy Zərdabi prospekti 574, Şokolad Tower, 1-ci mərtəbə, Bravo supermarketinin içərisində olan Smartzadə mağazasında yerləşdirilib. Həmin mağazaya yaxınlaşaraq yarasız batareyaları təhvil vermək mümkündür.
Həmçinin, Sumqayıt şəhəri, 9-cu mkr, Üzeyir Hacıbəyov küçəsi, Bravo Superstore-da yerləşən Smartzadə mağazasının filialında da analoji məntəqə yaradılıb.
Daha öncə EcoFront-un təşəbüssü ilə Bakıda daha 8 məntəqələrdə batareya toplanması üçün şərait yaradılıb.
Batareyaları 10-20 və ya daha çox sayda təhvil vermək məsləhət görülür. Əsas odur ki, onları saxlamaq üçün doğru vasitələrdən istifadə etmək lazımdır. Yararsız elementləri metal qablarda saxlamaq olmaz, çünki onlar sızıb korroziyaya səbəb ola bilər və torpağa nüfuz edə bilər.
Batareyaları atmaq üçün plastik qabdan istifadə edilməlidir. Hər hansı plastik qida və ya qeyri-ərzaq qab uyğundur. Batareyalar təhvil verilənə qədər qapalı bir qabda saxlanılır.
