"İşə düzəldəcəyim şəxsdən aldığım 2800 manatdan 2450 manatını Elm və Təhsil Nazirliyində şöbə müdiri işləyən şəxsə vermişəm".
Qaynarinfo-nun məlumatına görə, bu sözləri Cinayət Məcəlləsinin 178.1-ci maddəsi ilə təqsirləndirilən Elməddin Quliyev məhkəmədə ifadəsində bildirib.
Elməddin Quliyev deyib ki, anası ilə Bakı şəhəri ərazində yerləşən Bibiheybət məscidinə ziyarətə gedib. Orada Mərziyə adlı qadınla tanış olub. Mərziyə Elməddinin anasına deyib ki, qızım işsizdir. Daha sonra Elməddin anasının məsciddə tanış olduğu qadına zəng edib, söz verib ki, onun qızını Siyəzən şəhərində yerləşən 2 saylı tam orta məktəbdə laborant vəzifəsinə düzəldəcək. O, bu işə görə qadından 2800 manat pul alıb. Amma qızı işə götürülməyib, Mərziyə isə pulunu geri istəyib. Pul geri qaytarılmadığından zərərçəkmiş hüquq-mühafizə orqanlarına müraciət etməli olub.
Təqsirləndirilən şəxs məhkəmədəki ifadəsində Mərziyədən aldığı 2800 manatın 350 manatını özünün xərclədiyini, 2450 manatı isə Elm və Təhsil Nazirliyində şöbə müdiri vəzifəsində işləyən şəxsə verdiyini söyləyib.
Məhkəmədə nazirliyin adı açıqlanmayan şöbə müdiri vəzifəsində işləyən şəxsin də ifadəsi alınıb.
Məhkəmənin qərarı ilə Elməddin Quliyev Cinayət Məcəlləsinin 178.1-ci maddəsində nəzərdə tutulmuş cinayət əməlini törətməkdə təqsirli bilinərək, 5 ay 28 gün müddətə azadlıqdan məhrum edilib.
