Bakı Ağır Cinayətlər Məhkəməsində hakim Fəxri Məmmədovun sədrliyi ilə Cinayət Məcəlləsinin 178.3.2-ci (külli miqdarda dələduzluq etmə) maddəsi ilə təqsirləndirilən şəxs Yadigar Bilalovun məhkəmə prosesinin növbəti baxış iclası keçirilib.
"Unikal"ın məlumatına görə, şahid Minarə Bilalova ifadə verərək bildirib ki, Yadigar Bilalovu 8 ildir alver edən bir şəxs kimi tanıyır: “Mən qızıl alveri ilə məşğulam. Gəlib məndən mal götürüb, dediyi vaxtda da gətirib verib. Ümumi dövriyyəmiz 200 mindən çox olub. Mən eşidəndə ki, tutulub, ağladım."
Digər şahid Elman Hüseynov Yadigarı 1 dəfə gördüyünü deyib: "Mən Baki-Bərdə marşrutu üzrə sürücü işləyirəm. Xuraman xanım mənə qızıl üzük verdi, mən də gətirib Bakıda Yadigara çatdırdım".
İbtidai istintaqa ifadəsində isə Yadigara 3 dəfə qızıl gətirdiyini söyləməsi məlum olub.
Cinayət işində 2 nəfər - İbrahimov İlqar David oğlu və Məmmədova Xuraman Mədət qızı zərərçəkmiş qismində tanınıb. Yadigar Bilalov 1-ci şəxsə qarşı 95 min, 2-ci şəxsə isə 40 min manat dələduzluq edib. Məlum olub ki, Yadigar Bilalov Moskva Univermağında qızıl alqı-satqısı ilə məşğul olub. Dələduzluq etdiyi şəxslər də elə qızıl alverçiləri olub.
