Xəzər Rayon Məhkəməsində qəsdən sağlamlığa yüngül zərər vurmaqda təqsirləndirilən Cəlil Omarovun cinayət işi üzrə proses yekunlaşıb.
Məhkəmənin hökmü ilə o, cinayət məsuliyyətindən azad edilib və işə xitam verilib.
Hadisə 18 fevral 2026-cı ildə Xətai rayonunda yaşadıqları mənzilin yataq otağında baş verib. Cəlil Omarov (ad və soyad şərtidir) qeyri-rəsmi münasibətdə olduğu Yasəmən Səlimova ilə qısqanclıq zəminində mübahisə edib və onu baş nahiyəsindən vurub. Qadın yüngül xəsarət alıb.
Məhkəmədə təqsirləndirilən şəxs ona qarşı irəli sürülmüş ittiham üzrə özünü təqsirli bilib və əməlindən peşman olduğunu bildirib. O, ifadəsində göstərib ki, Yasəmənlə 2021-ci ilin yanvar ayından qeyri-rəsmi nikah münasibətində yaşayır və bu müddət ərzində aralarında ciddi problem yaranmayıb.
Yasəmən Səlimova isə məhkəmədə deyib ki, hazırda təqsirləndirilən şəxslə barışıb, ona qarşı şikayəti, tələbi yoxdur.
Nəticədə tərəflərin barışması nəzərə alınaraq cinayət təqibinə xitam verilib.
