Bakı sakinləri böyük dələduzluqla üzləşib. Bu barədə "Facebook" sosial şəbəkəsində jurnalist Asim Cəlilov məlumat verib. O bildirib ki, bacısının yoldaşının vəfatından sonra qaraçılar vəziyyətdən sui-istifadə edərək yaxınlarının xeyli pulunu mənimsəyiblər.
Asim Cəlilov qeyd edib ki, bacısının yoldaşı 38 yaşında xərçəng xəstəliyindən həyatını itirib, bu hadisədən 10 gün sonra qaraçıların dələduzluğu ilə üzləşiblər: "İki qaraçı - ata və qızı gəlib bacımın qayınanasına deyiblər ki, pul verməlisən, mən də gedib qurban alım, kəsim, yoxsa nəvələrin də öləcək. Ananın hazırkı vəziyyətindən istifadə edərək 500 manat alıb. Daha sonra onun otaqda olmamasından istifadə edərək bacıma deyib ki, sən də qızıl verməsən, uşaqların da öləcək. Bacımdan da qızıl alaraq çıxıb gediblər. Ailəyə 1500 manat dəyərində ziyan vurulub”.
Asim Cəlilov vurğulayıb ki, bu, ata və qızının ilk işi deyil.
Şikayətçi vurğulayıb ki, sentyabr 27-si polisə şikayət edilib, hadisə həyətdə olan təhlükəsizlik kamerasına düşüb, bu görüntüdə adamların üzləri sezilir, onların fotoları da polisə təqdim edilib: “Hadisədən 12 gün keçməsinə, fotoların və videolarını olmasına baxmayaraq bu iki adam hələ ki tapılmayıb”.
Daxili İşlər Nazirliyinin mətbuat xidmətinin rəhbəri Elşad Hacıyev jurnalistin Facebook statusuna şərh yazaraq bilirib ki, məsələ ilə bağlı araşdırma aparılır.
