Oktyabrın 21-dən 22-ə keçən gecə bölgələrdə və Bakıda yağan aramsız yağış bir sıra fəsadlara yol açdı. Yağıntının normadan artıq olması bir sıra ərazilərdə subasmaya səbəb oldu. Hətta Sabunçu rayonu ərazisində yağış sularının tunelə dolması iki nəfərin ölümü ilə nəticələndi.
Milli Hidrometeorologiya Xidməti oktyabrın 27-ə olan hava proqnozunu açıqlayıb.
Bildirilib ki, Bakıda və Abşeron yarımadasında bəzi yerlərdə arabir yağış yağacağı gözlənilir. Gecə yarımadanın bəzi yerlərində yağıntıların leysan xarakterli olacağı, şimşək çaxacağı ehtimalı var.
Bəs görəsən, məsul qurumlar edilən xəbərdarlıqdan sonra leysan yağışa hazırlaşıblarmı? Bu dəfə də eyni fəsadların yaşanmaması üçün hansısa addımlar atılıbmı?
Məsələ ilə bağlı BakuPlus.az-ın əməkdaşı İri Şəhərlərin Birləşmiş Su Təchizatı Xidmətinin nümayəndəsi Ceyhun Musaoğlu ilə əlaqə saxlayıb.
C.Musaoğlu hava şəraiti ilə əlaqədar hər zaman tədbir görüldüyünü qeyd edib:
“Qurum hava şəraiti ilə bağlı öncədən qabaqlayıcı tədbirlər görür. Mütəmadi olaraq, bu işlər qurum tərəfindən həyata keçirilir. Tullantı su sistemləri və yağış suyunu qəbul edən drenaj sistemlər rayon Sukanal idarələri tərəfindən mütəmadi təmizlənir və nəzarətdə saxlanılır”.
Nəzrin Vahid
